Í síðastliðinni viku sat ég minn fyrsta bæjarstjórnarfund og fór ég nokkrum sinnum upp, m.a. til að sækja upplýsingar.  Eitt af því sem ég spurði formann Atvinnu- og hafnaráðs Reykjanesbæjar út í var hvað starfsmaður Atvinnusviðs Reykjanesbæjar væri að sýsla um þessar mundir til að hámarka fjárfestingu Reykjaneshafnar í Helguvík, en fyrir þá sem ekki vita er starfandi atvinnufulltrúi hjá ATH-sviðinu.

Því miður var fátt um svör og þótti mér leitt að heyra þegar bæjarstjórinn svaraði því svo að starfsmaðurinn væri meira í öðrum verkefnum á skrifstofunni.

Ég komst því ekki hjá því að hugsa út í það að á undanförnum mánuðum og árum hafa valdamenn hér í bæ verið afar háværir í gagnrýni sinni á ríkisvaldið en hafa svo lítið eða ekkert gert í málunum sjálfir.

Vissulega er búið að setja á stofn Hekluna, atvinnuþróunarfélag Suðurnesja.  En þess má geta að fjármagnið fyrir það verkefni kemur frá Iðnaðarráðuneytinu! Auk þess sem slík skrifstofa var starfandi hér á árum áður, en fljótlega eftir að nýr bæjarstjóri tók við var skrifstofan lögð niður og atvinnumálin falin inn í rekstri Reykjaneshafnar, sem á víst nóg með sitt…

Alltof lengi höfum við gleymt okkur í að hugsa um álverið í Helguvík og fyrir vikið hefur öll önnur vinna fjarað út, þangað til kreppan skall á.  Ef bæjaryfirvöld hefðu verið aðeins undirbúnari þegar kreppan skall á, rétt eins og þau hefðu mátt vera nokkrum misserum áður þegar Bandaríkjaher kvaddi á haustmánuðum 2006.  En á stefnu meirihlutans í Reykjanesbæ má einna helst lesa að best er að vera vitur eftirá og treysta á að ríkið reddi okkur.

Mynd: Óli Haukur - http://www.flickr.com/photos/olihaukur/

Ég velti því fyrir mér hversu vel svona guerrilla markaðssetning skilar sér þegar öllu er á botninn hvolft.  Fyrirtæki í öllum geirum virðast sjá sig knúin til að fara í gang með Facebook share leik til að laða að sér sem flesta áhangendur, en til hvers?  Ekki heldur Karen Millen að markhópurinn sem hefur ekkert betra að gera en að deila FB síðunni þeirra sé svo sterklega efnaður að hann hafi efni á að versla hjá þeim?

Ég skil vel þá sem taka þátt í svona leikjum, það er alltaf skemmtileg tilhugsun að fá mikið fyrir mjög lítið, en eins og svo oft áður þá er búið að eyðileggja þessa tegund markaðssetning fyrir næstu 1000 árin.

Ég biðla því til allra minna Facebook vina, plís viljið þið hætta að segja mér hvað ykkur langar í iPad... farið bara og kaupið ykkur iPad ef ykkur vantar hann, þetta eru fínar græjur.

Fréttablaðið sagði frá því að íslenska ríkið ætlaði sér að kaupa jarðhitaauðlindir þær sem Alterra (Magma/Geysir Green) leigir til sín, en þær eru alfarið í eigu Reykjanesbæjar.

Menn fagna því að þarna sé verið að koma jarðhitaauðlindum í eigu ríkisins og kjósa að horfa framhjá því að auðlindirnar voru þegar í eigu hins opinbera í gegnum Reykjanesbæ.  Einnig sleppa menn alfarið að nefna að auðlindirnar, sem nú eru leigðar út, eru bundnar í leigusamning við Alterra til 65+65 ára.  Þ.e. núverandi leigusamningur gildir til 65 ára og er ákvæði í honum sem segir að leigutaka sé í sjálfvald sett hvort hann kjósi að framlengja leigusamningnum um önnur 65 ár.

En snilldin fyrir ríkið virðist að mestu vera að þeir borguðu bara með skuldajöfnun því fjármagnstekjuskattur sem Reykjanesbær skuldaði vegna sölunni á HS Orku á sínum tíma var enn ógreiddur, og líklega dugar þessi sala ekki til að afskrifa hann með öllu.

Enn einn stórfurðulegi og óskiljanlegi kaflinn er því skrifaður í þessu máli...

Sá áróður að á ríkið hafi ekkert gert á Suðurnesjum hefur verið hávær um langa tíð og er þá oftar en ekki skautað framhjá grunvallaratriðum sem henta ekki boðskapnum.

Vissulega hefur dregið úr þjónustu hins opinbera á Suðurnesjum, líkt og alls staðar á landinu, en við megum ekki gleyma því sem bæst hefur við.  Samtakamáttur þingmanna Suðurkjördæmis skilaði t.d. Keili inn á fjárlög í fyrsta skiptið í fyrra og leystist þar með vandinn um framtíð þeirrar flottu menntastofnunar.

Annað gott dæmi um stuðning ríkisins við menntun á Suðurnesjum er frá því í dag en Víkurfréttir segja frá því á fréttavef sínum að Mennta- og menningarmálaráðuneytið hafi gert samning við Fisktækniskóla Íslands sem starfræktur er í Grindavík.

Auðvitað er ekki allt svona æðislegt því Víkurfréttir sögðu líka frá því í dag hvernig Heilbrigðisstofnun Suðurnesja ætlar sér að ná fram frekari sparnaði og eru margar þeirra leiða dæmigerðar... það er alltaf mötuneytið og ræsingarnar sem eiga að sparast.

Að lokum vil ég enn og aftur minna á að Kadeco er í 100% eigu íslenzka ríkisins og skal því haldið til haga að það góða starf sem þar er unnið er allt í boði hins opinbera.

Guðni Ágústsson má muna fífil sinn fegurri enda eitt sinn á meðal vinsælustu stjórnmálamanna Íslands en nú verður hann að treysta á þá örfáu bittlinga sem Framsókn hefur úr að moða. Hann skrifaði grein í Morgunblaðið sl. föstudag sem er það skemmtilegur skáldskapur að mér finnst það sóun ef hún birtist ekki víðar en í föstudagsmogga sem 15-20 manns lesa. Ég stelst því til að birta skáldskapinn hér öðrum til skemmtunar, ég vona að enginn reiðist mér :)

,,Leikstjórinn mikli,“ Össur Skarphéðinsson

Eftir Guðna Ágústsson

„Ég er enn á lífi í pólitík af því að ég er svolítið ,,paranoid“ í nasavængjunum.“

Á föstudag var landsfundur Samfylkingarinnar settur með pompi og prakt.  Mikið var um dýrðir, Ungir jafnaðarmenn minntust félaga sinna sem féllu í voðaverkunum í Noregi í sumar og var ekki einn gesta setningarinnar ósnortinn eftir þá athöfn.  Að því loknu fór formaður flokksins og forsætisráðherra vor, Jóhanna Sigurðardóttir, yfir víðan völl.

Þegar kórsöngurinn þagnar og ljósin eru kveikt, þá hefst fjörið sem margir flokksfélagar lifa fyrir.  Þarna hittast jafnaðarmenn frá öllum landshornum og ræða sig niður á niðurstöðu í öllum málefnum sem snerta land og þjóð.

Þótt formaður og varaformaður flokksins hafi verið sjálfkjörnir þýðir það þó ekki að engin spenna sé þegar kemur að kosningum á fundinum því barátta var um stöðu ritara flokksins í dag þar sem Bergvin Oddsson tók slaginn á móti Helenu Karlsdóttur, sitjandi ritara.  Einnig ber að geta þess að Hilmar Kristinsson, fyrrum formaður Uglu – ungra jafnaðarmanna á Suðurnesjum, er í framboði til gjaldkera ásamt Vilhjálmi Þorsteinssyni.  Utan við þessi framboð eru að sjálfsögðu hin fjöldamörgu framboð til framkvæmdastjórnar, flokksstjórnar o.fl. fjörið er því á göngum Hlíðarenda fyrir mörgum þar sem bræðralög eru svarin eins og vant er í kosningum.

Það verður því spennandi sunnudagur sem færir okkur niðurstöður málefnanefnda, kosninga ásamt loka þessarar erfiðu en stórskemmtilegu helgi.